சென்னை ஐஐடி வழங்கும் ‘பி.எஸ். டேட்டா சயின்ஸ் அண்ட் அப்ளிகேஷன்ஸ்’ படிப்புக்கு, அமெரிக்காவைச் சோ்ந்த ‘காா்கில்’ என்ற பன்னாட்டு நிறுவனம் முழு கல்வி உதவித்தொகை வழங்குவதாக அறிவித்துள்ளது.
பி.எஸ். டேட்டா சயின்ஸ் அண்ட் அப்ளிகேஷன்ஸ் என்ற நான்காண்டு பட்டப்படிப்பை, கடந்த 2020- ஆம் ஆண்டு ஜூன் மாதத்தில் அறிமுகப்படுத்தியது. இந்தப் படிப்பில் சோ்க்கை பெற பிளஸ் 2 தோ்ச்சி பெற்ற யாா் வேண்டுமானாலும் விண்ணப்பிக்கலாம்.
இதற்கு வயது வரம்பு இல்லை.
‘மல்டிபிள் எக்ஸிட்’ வாய்ப்புள்ள இந்தப் படிப்பில் பட்டம், பட்டயம், ஓராண்டு சான்றிதழ் படிப்பு ஆகியவற்றை நிறைவு செய்வோருக்கு சான்றிதழ்கள் வழங்கப்படுகின்றன. மூன்றாம் ஆண்டில் அடியெடுத்து வைத்துள்ள இந்தப் படிப்பில், தற்போது 17 ஆயிரம் மாணவா்கள் படித்து வருகின்றனா். 195 மாணவா்கள் பட்டப்படிப்பு அளவிலும், 4 ஆயிரத்துக்கும் 500-க்கும் மேற்பட்டோா் டிப்ளமோ அளவிலும் உள்ளனா்.
இந்நிலையில், ‘காா்கில்’ என்ற அமெரிக்காவை தலைமையிடமாகக் கொண்ட பன்னாட்டு உணவு மற்றும் வேளாண்மை நிறுவனம், ஐஐடி உடன் இணைந்து பி.எஸ்.டேட்டா சயின்ஸ் அப்ளிகேஷன்ஸ் படிப்பைத் தொடர விரும்பும் மாணவா்களுக்கு முழு உதவித்தொகை வழங்குவதாக அறிவித்துள்ளது.
இந்தக் கல்வி உதவித் தொகையைப் பெற தகுதியின் அடிப்படையில் மாணவா்கள் தோ்வு செய்யப்படுவா். இதில் ஆண்டுதோறும் சுமாா் 7,500 புதிய மாணவா்களுக்கு உதவித்தொகை வழங்கப்படவுள்ளது.
5 லட்சத்துக்கும் குறைவான ஆண்டு வருமானம் கொண்ட மாணவா்களுக்கு இந்த உதவித்தொகை வழங்கப்படும். இது பொருளாதாரத்தில் பின்தங்கியிருக்கும் நூற்றுக்கும் மேற்பட்ட மாணவா்கள், சென்னை ஐஐடியில் உயா்கல்வி படிக்கப் பயனுள்ளதாக இருக்கும்.
இது குறித்து ஐஐடியின் டீன் மகேஷ் பஞ்சக்நுலா கூறுகையில் ‘பி.எஸ். படிப்பை மேற்கொண்டுள்ள மாணவா்களில் நான்கில் ஒருவா் பொருளாதாரத்தில் பின்தங்கிய நிலையிலிருந்து வந்தவா். இந்தியா முழுவதும் தகுதியுடைய மற்றும் திறமையான மாணவா்களுக்கு சென்னை ஐஐடியில் தங்கள் கனவுக் கல்வியைத் தொடா்வதற்கான வாய்ப்பை காா்கில் உதவித்தொகை வழங்குகிறது. மாணவா்களின் குடும்ப நிதிச்சுமையைக் குறைக்க இந்த கல்வி உதவித்தொகை உதவியாக இருக்கும் என்றாா் அவா்.
இந்த கூட்டுமுயற்சி குறித்து காா்கில் பிசினஸ் சா்வீசஸ் நிறுவனத்தின் இந்தியத் தலைவரும், தொழில்நுட்பத் தலைவருமான சுமித் குப்தா கூறும்போது, ‘குறைந்த வருமானம் கொண்ட குடும்பங்களைச் சோ்ந்த திறமையான மாணவா்களுக்கு, சம வாய்ப்புகளை உருவாக்குவதில் அக்கறையுடன் செயல்படுகிறோம்’ என்றாா்.