កម្ពុជាស្នើសុំជំនួយវ៉ាក់សាំងប្រឆាំងកូវីដ១៩ពីឥណ្ឌា
បន្ទាប់ពីទទួលបានវ៉ាក់សាំងការពារជំងឺកូវីដ១៩ ចំនួន១លានដូសពីប្រទេសចិនរួចមក លោកនាយករដ្ឋមន្ត្រី ហ៊ុន សែន នៅថ្ងៃនៅចន្ទទី១៨មករានេះ បានស្នើសុំវ៉ាក់សាំងកូវីដ១៩ ពីប្រទេសឥណ្ឌាផងដែរ។ ការស្នើសុំជំនួយវ៉ាក់សាំងពីប្រទេសឥណ្ឌា នៅពេលនេះ បានធ្វើឡើងបន្ទាប់ពីមានជំនួបមួយនាព្រឹកនេះ រវាងលោកនាយករដ្ឋមន្ត្រី ហ៊ុន សែន ជាមួយនឹងឯកអគ្គរដ្ឋទូតឥណ្ឌាប្រចាំនៅកម្ពុជាលោកស្រី Devyani Uttamkhobragade នៅវិមានសន្តិភាព។
ចុះផ្សាយនៅថ្ងៃ៖
ស្តាប់ - ០១:៤៨
ការស្នើសុំជំនួយជាវ៉ាក់សាំងបង្ការកូវីដ១៩ពីឥណ្ឌាដោយសារកម្ពុជាមើលឃើញថា ប្រទេសឥណ្ឌាបានផលិតវ៉ាក់សាំងកូវីដ១៩បានដោយខ្លួនឯង ហើយគ្រោងនឹងចាក់ជូនប្រជាពលរដ្ឋរបស់ខ្លួនជាង៣០០លាននាក់នៅក្នុងឆ្នាំនេះ។ បើតាមលោក ហ៊ុន សែន វ៉ាក់សាំងដែលផ្ដល់ដោយចិនអាចនឹងមិនគ្រប់គ្រាន់តាមតម្រូវការសម្រាប់ចាក់ជូនប្រជាពលរដ្ឋកម្ពុជា។ ក៏ប៉ុន្តែនៅមិនទាន់មានចម្លើយតបបែបណានៅឡើយពីខាងភាគីឥណ្ឌា ជុំវិញការស្នើសុំវ៉ាក់សាំងបង្ការកូវីដ១៩ របស់លោកនាយករដ្ឋមន្ត្រីកម្ពុជានាពេលនេះ។
គួរកត់សម្គាល់ដែរថា ការស្នើសុំវ៉ាក់សាំងកូវីដ១៩ពីឥណ្ឌានៅពេលនេះ ធ្វើឡើងមួយថ្ងៃបន្ទាប់ពីចិនប្រកាសថានឹងផ្តល់ឲ្យកម្ពុជានូវវ៉ាក់សាំងប្រឆាំងកូវីដ១លានដូស។ ការទទួលយកវ៉ាក់សាំងរបស់ចិននៅពេលនេះ ជាការវិវត្តថ្មីមួយផ្ទុយពីអ្វីដែលលោកនាយករដ្ឋមន្ត្រី ហ៊ុន សែន ធ្លាប់បានប្រកាសកាលពីពាក់កណ្ដាលខែធ្នូ ឆ្នាំ២០២០ ថា កម្ពុជានឹងទទួល ឬទិញតែវ៉ាក់សាំងណា ដែលអង្គការសុខភាពពិភពលោក WHO ទទួលស្គាល់ក្រោមគំនិតផ្ដួចផ្ដើមពី COVAC តែប៉ុណ្ណោះ។ បើតាម លោក ហ៊ុន សែន ការទទួលយកវ៉ាក់សាំងរបស់ចិនមកប្រើប្រាស់នៅពេលនេះ គឺដោយសារតែមានភាពចាំបាច់។
ជាមួយគ្នានេះ លោកវេជ្ជបណ្ឌិត នុត សម្បត្តិ ប្រធានវិទ្យាស្ថានវេជ្ជសាស្ត្រ ជីវសាស្ត្រ និងកសិកម្មនៃរាជបណ្ឌិតសភាកម្ពុជាលើកឡើងថា កម្ពុជាមិនអាចរង់ចាំការទទួលស្គាល់គុណភាពវ៉ាក់សាំងពីអង្គការសុខភាពពិភពលោកចាំបញ្ជាទិញនោះទេ ព្រោះនេះជាភាពចាំបាច់សម្រាប់សុខភាពសាធារណៈ។ ចំណែកសាធារណៈជនក៏មិនគួរបារម្ភពេកទេ អំពីគុណភាពវ៉ាក់សាំងរបស់ចិន ដោយសារថ្នាក់ដឹកនាំរបស់គេបានចាក់វារួចទៅហើយ។
ទោះយ៉ាងណា គេនៅមិនទាន់ដឹងជាក់លាក់នៅឡើយទេថា រដ្ឋាភិបាលកម្ពុជាគ្រោងស្នើសុំជំនួយថ្នាំវ៉ាក់សាំងប្រឆាំងកូវីដ១៩ពីប្រទេសជាមិត្តប៉ុន្មាន ហើយសម្រេចចិត្តទិញខ្លួនឯងប៉ុន្មាននោះទេ ខណៈគណៈកម្មការអន្តរក្រសួងមួយដឹកនាំដោយក្រសួងហិរញ្ញវត្ថុ កំពុងបើកការពិគ្រោះគ្នានៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ