Паўтары гады калоніі прысудзілі гарадзенцу за аўтамабільны гудок, якім ён павітаў пратэстоўцаў
Гародня, 10 жніўня 2020 года. Ілюстрацыйнае фота.
У судзе Кастрычніцкага раёну Гародні першага снежня быў абвешчаны яшчэ адзін прысуд па крымінальнай справе, звязнай з падзеямі ў абласным цэнтры 10 жніўня 2020 года. Дзмітрыя Горбача судзілі за арганізацыю і падрыхтоўку дзеянняў, якія груба парушаюць грамадскі парадак (ч.1 арт. 342 Крымінальнага кодэкса).
Справу разглядаў суддзя Віталь Лабоцкі.
Падставай для крымінальнай справы сталі падзеі 10 жніўня 2020 году. У той дзень Дзмітрый Горбач ездзіў каля абласной філармоніі і сігналіў аўтамабільным гудком мітынгоўцам, піша "Гарадзенская праваабарона".
На другі дзень, 11 жніўня, яго затрымалі, але неўзабаве адпусцілі. А некалькі месяцаў таму ў гэтым годзе затрымалі зноў і ўзялі да суда пад варту.
Дзмітрый Горбач мае інваліднасць трэцяй групы. У калоніі яму адбываць пасля пераразліку дзён трымання пад вартай у следчым ізалятары, засталося менш чым паўтары гады.
Дзяржабвінаваўца запрасіў у суда для абвінавачанага паўтары гады пазбаўлення волі ў калоніі агульнага рэжыму.
Столькі суддзя Віталь Лабоцкі і прысудзіў Дзмітрыю Горбачу.
