သျှမ်းပြည် မြောက်ပိုင်း လာရှိုးမြို့နယ် မိုင်ယော်ဒေသတွင် တိုင်းရင်းသားလက်နက်ကိုင်များက နေအိမ်အထိ စစ်သားများ လိုက်လံစုဆောင်းနေကြောင်း သတင်းရရှိသည်။
တိုင်းရင်းသားလက်နက်ကိုင်များမှ စစ်သားများလိုက်လံစုဆောင်းမှု ကို ယခင်ကထပ် ပိုပြီးလုပ်ဆောင်နေကြောင်း၊ နေအိမ်ထဲထိ လိုက်လံဖမ်းဆီးနေသဖြင့် ထိုဒေသတွင်နေထိုင်သည့်သူများသည် ထွက်ပြေးတိမ်းရှောင်နေရကြောင်း မိုင်းယော်ဒေသခံ များက ပြောသည်။
“ အရင်တွေကတော့ သူတို့လူပို့လာပေးဖို့ပဲတောင်းတယ်။ ဒီနှစ်ကစပြီးတော့ အဲလိုမဟုတ်တော့ဘူး။ သူတို့ အိမ်ထဲထိ လိုက်ဖမ်းတာ။ သူတို့ လာဖမ်းတဲ့ချိန်က နေ့လည်မဟုတ်ဘူး။ ညနက်တဲ့အချိန်မှ လာတာ။ ပြည်သူတွေအိပ်နေတဲ့ အချိန်မှလာတာ။ ဒီနှစ် သူတို့ စစ်သားအရမ်းကောက်ယူလာတယ်” ဟု မိုင်းယော်ဒေသခံ ပြည်သူတစ်ဦးက သျှမ်းသံတော်ဆင့် ကို ပြောသည်။
မိုင်းယော်ဒေသတွင် လှုပ်ရှာနေသည့် တိုင်းရင်းသားလက်နက်ကိုင်များ သည် ကိုကန့် (MNDAA) ၊ ကချင်တပ်မတော် (KIA) ၊ တအောင်း(ပလောင်း) TNLA၊ ရခိုင်တပ်မတော်( AA) ၊ သျှမ်းတပ်မတော် ဝမ်းဟိုင်း (SSPP)၊ နှင့် အာဏာသိမ်းစစ်ကောင်စီတို့ ဖြစ်ကြောင်းသိရသည်။
“ ဒီဘက်မှာ အဓိက စစ်သားကောက်နေတာက တိုင်းရင်းသားလက်နက်ကိုင်တွေပါ။ အိမ်ထဲထိဝင်ဖမ်းသွားတယ်။ တချို့အိမ်က ယောင်္ကျားသားပဲရှိတာ။ တပ်ထဲပို့လိုက်ရင် ရှာကျွေးမဲ့သူက မရှိတော့ မိဘတွေကလည်း မပေးချင်။ အဲ့ဒါနဲ့ ထွက်ပြေးနေရတယ်” ဟု မိုင်းယော်ဒေသခံ အမျိုးသား တဦး က ပြောသည်။
မိုင်းယော်မြို့တွင် မိသားစုဝင်ထဲမှ သား၊ယောင်္ကျားများကို စစ်တပ်ထဲသို့ မပေးချင်ပါက ယခင်တွင် နယ်စပ်ဒေသသို့ သွားရောက် အလုပ်လုပ်စေခဲ့ပြီး၊ လက်ရှိမှာ ကိုဗစ်-၁၉ ကာလကြောင့် နယ်စပ် တံခါးများပိတ်ထားသဖြင့် တခြားမြို့နယ်ကိုသာ ပုန်းရှောင်နေရကြောင်း သိရသည်။
“အခု ပြည်သူတွေ အကုန်ထွက်ပြေးနေကြပြီ။ အများစု ထွက်ပြေးနေရတာတော့ တအောင်း(ပလောင်း)၊ တရုတ်၊ ကိုးကန့်၊နဲ့ ကချင်လူမျိုးတွေတော့ ထွက်ပြေးနေကြရတယ်။” ဟု ၎င်း က ထပ်လောင်းပြောသည်။
မိုင်းယော်ဒေသသည် လာရှိုးမြို့နယ်တွင်တည်ရှိပြီး ကျေးရွာအုပ်စု ၃၁ ခုရှိကြောင်းသိရသည်။
